Brownies de chocolate

Nun ye que me punxera romántica de sópitu, non. Fícelo por da-yoslos a mios pas pol so aniversariu. Prestaron-yos abondo y espero qu'a vosotros tamién. Ye un postre fácil y mui resultón. Vamos con él.

Como cosa teúnica necesitamos un molde (a ver, que nun fai falta que sean corazoninos, nin ositos, nin flores... Con un molde pa bizcochos normales val de sobra) ;)

Ingredientes:

• 120 gramos de mantega.
• 150 gramos de chocolate picao.
• 200 gramos d'azúcare.
• 2 güevos.
• 120 gramos de farina.
• 150 gramos de nueces picaes.
• Plizcu de sal.

Prendemos el fornu a temperatura fuerte: 180 graos más o menos.

Entamamos poniendo nel fueu mui suavino, al 2 ó 3, la mantega y el chocolate, pa que fundan y se xunten.

Cuando tean, quitamoslo del fueu y echamos l'azúcare mientres revolvemos; dempués los güevos enteros d'ún nún; la farina; y pa finar, les nueces.
Cuando tea too bien mezclao, echámoslo nun molde engrasáu  y pal fornu 10 minutos.
Cuando pasen, baxamos la temperatura hasta los 150 graos, más o menos, y dexámoslo otros 10 minutos más.
(Si lo metéis en moldes más altos o más baxos que los mios de corazoninos, lo meyor pa saber que tan bien fechos, ye que metáis un paliyu de madera: tien que salir moyáu pero nun mancháu, el brownie tien que tar cremosu pel centru)

Nun faigais como yo y lo intentéis desmoldar na más salir: a parte de quemar, rompen... Esperái que yá veréis qué bien desmolden dempués d'un cachín. 

Echamos-y azúcare glas penriba con un colador (pa tamizalo y que nun queden gurullos).
Y llisto. 

Avisái de lo riquísimos que tán anantes de que los coman, que-yos pue dar daqué ;)

Muá.

Galletes de mantequilla y vainilla

Préstame pola vida faer galletes en casa pa nun tener que mercar de les industriales. Ye mui fácil, de verdá. Y merez muncho la pena'l sabor y la tranquilidá de saber que tán feches por tí y que tolo que lleven ye bueno.

Estes galletes son una versión de les de mantequilla de tola vida (que dalgún día pondré equí), ameyoraes. 

Pa que queden curioses con esta receta, teniendo en cuenta'l tiempu nel fornu y los graos, hai que cortales más o menos igualadines y aplastales con un rodiyu. Asina que necesitamos cortapastes y rodillu.

Pa 40 galletines, más o menos, vamos necesitar:

• 250 gramos de mantequilla.
• 250 gramos de farina.
• 125 gramos de maicena.
• 125 gramos d'azucare.
• Plizcu de vainilla molío (o una caxina de vainilla: yá sedría xenial).
• 1/2 sobre de formientu químicu.
• 1 güevu.
• 2 cuyaraes de nata llíquido.
• Cacau en polvu.
• Un plizcu sal.

Mezclamos nuna conca: la farina, la maicena, el formientu y un plizcu sal xunto cola nata, y amasámoslo mui bien.

N'otru sitiu, batemos coles barilles llétriques la mantequilla col güevu, l'azucare y la vainilla hasta que tea mui suavina, y déxamoslo envuelto en film 1 hora na nevera.

Precalentamos el fornu a 175 graos.

Enfarinamos mui bien la encimera pa char la masa enriba y poder estirala col rodiyu (nun vos cortéis cola farina, va chupavos muncha hasta que podáis estirala sin que se vos pegue; enfarinar tamién el rodillu y les manes).

Estiramos bien la masa hasta que seya de 4-5 milímetros (ye importante que, aunque seya más o menos gruesa, toles galletines seyan iguales). Pa los que como yo nun tais mui dello, lo meyor que facéis ye cortar la masa en 4 cachos, y dir estirándolos y cortando les galletes d'una nuna (si non, ye muncho más complicao).

Ponemos un papel de fornu nuna bandexa y vamos poniendo les galletines cortadines (nun fai falta separales muncho, nun crecen).

Metémosles p'allá de 12 a 15 minutos (depende de lo gordes que les ficiéreis: nun tienen que quedar mui doraes, na más que se-yos quite'l colorucu blancu).

Cuando tean, sacámosles y chamos-yos penriba cacau en polvu.

Amás del sabor que tienen, que ye un prestor, ¡va golevos la casa...!

Muá

Fogaza de pan riquísima, facilísima y rapidísima.

¡Pan caserísimu! 

Nun me lo podía creer cuando ví'l mio primer pan con tan buena pinta... Y nun se necesita ni panificadora, ni maquinina carísima, ni saber amasar... 

Pues bien, vamos entamar colos miedos que desapaecen al faer esti pan:

 - ¡Hai qu'usar ingredientes raros, y nin sé nin onde mercalos!

 - ¡Nun tengo panificadora!

 - Tol mundu me diz lo difícil que ye amasar.

 - El mio fornu nun tien aire.

 - Hai que face-y 2000 amasaos y 40 hores d'espera.

¡Non! Y vamos empezar cola receta pa que vayáis entrando en farina ;)

• 220 gramos de farina integral tamizao.
• 220 gramos de farina blanco de fuercia.
• 7 gramos de formientu secu activu (cómprase en sobres pequeños, como el formientu tipu Royal)
• 1 cuyarada sopera de sal fino.
• 250 cl. d'agua templao.
• Plizquín d'azúcare moreno.

Hai qu'empezar precalentado'l fornu pa que tea arroxadín cuando metamos el pan. Asína que ponémoslu a 220 graos.

Vamos poner nuna conca grande les dos clases de farina col formientu, la sal y l'azucare. Cuando tean tolos ingredientes secos bien mezclaos, chamos-y l'agua. ¿Cuánta? Pues esto si qu'hai que dir viéndolo: empezái con 50 cl. d'agua templao, y vais chando poquitín a poco hasta que notéis que ye más fácil amasalo. Amasáis un cachín, pero nun vos paséis: cuando nun se vos pegue la masa a los deos ye que yá ta.

Facémos-y forma de bola a la masa y ponémosla enriba d'una bandexa de fornu con un papel, pa que nun se mos pegue. Embadurnamoslu con aceite vexetal, tapamos con film y dexamos que repose 30 minutos (si ye más, meyor, pero menos non, que tien que yeldar pa que mos quede una fogazuca curiosa).

Pasáu'l tiempu, facémos-y unos cortes penriba y que repose tapáu col film 10 minutinos más.

Agora vien el trucu... Pa que mos salga con esa cortecina tan profesional, hai que pone-y xelu nel fondu´l fornu, meter la fogaza a media altura y esperar...

En 30 ó 40 minutinos (yo túvelo 30 porque éntrenme nervios y ganes de ver qué tal...), tenemos el pan. ¡Y qué pan! :)

Muá
(Receta de Lorraine Pascale)

Madalenes de chocolate rellenes de mermelada de piescu

Pues, faciendo honor al títulu del blogue, la mio primer receta tenía que llevar piescos en dalgún llau. Nesti casu metíos dientro d'una madalena de chocolate riquísima... 

Vamos necesitar un molde pa facer madalenes, los papelinos pa pone-yos y, en plan téunicu, nada más. Asina que vamos pola receta prestosa de güei :)

Vamos necesitar:

• 125 gramos de mantequilla.
• 125 gramos d'azucre.
• 150 gramos de farina tamizao.
• 1 sobre de formientu químicu, tipu Royal.
• 2 ó 3 güevos, dependiendo'l tamañu.
• 50 gramos de chocolate pa fundir.
• Mermelada de piescu riquísima.

Primero, encendemos el fornu a 180 graos pa que tea bien arroxáu cuando acabéis de mezclalo too.

Entamamos la tema batiendo la mantequilla y l'azucre hasta que l'amiestu tea bien suavino (nun pue vese azucre nin mantequilla ensin mezclar).

Por otru llau batimos muncho los güevos.

Acabante, vamos echando los güevos seliquino a la mezcla del azucre y la mantequilla, hasta que tea too bien mecío. Metemos p'allá la farina y el formientu tamizao, poqutín a poco pa que nun mos cueste muncho.

Dempués echáis el chocolate fundío (podéis fundilo nel microondas con muncho cuidao de que nun se vos queme, pero si lo ponéis a poca potencia nun vais tener problema, y asina aforráis tiempu y manchar más coses...)
Amestaislo too bien bien y ¡llisto! Yá tais preparaos pa enllenar los papelinos de les madalenes.

Tenéis qu'enllenar la base del papelín col amiestu, dexando como un furaquín na metá pa meté-y p'allá una cucharadina de la mermelada de piescu. Dempués tapáis la mermelada con más amiestu y yá ta, pal fornu.

Hai que tenelo allá media horuca más o menos (eso depende muncho de cada fornu, pero vese bien por fuera, y sin nun sois quien a davos cuenta, lo meyor ye que metáis un pinchín de maera o un cuchiellu: si sal manchao ye que nun ta; si sal llimpiu, ta llisto pa sacar). Eso sí, nun vos asustéis si lo notáis blanduco, ye normal porque tien muncha mantequilla y hasta que nun s'enfríe nun endurez.

Espero que vos preste la receta tanto como a min. :D

Muá

Nel entamu

Nunca nun lo pensara na vida... Pero, equí toi, con un blogue... Diba dicir "de cocina", pero igual ye muncho dicir, vamos dexalo en "pa comer" ;)

Fai tiempu que, por coses de la vida, tuvi qu'entamar a cocinar. Ye verdá que vengo de familia chigrera, pero pa min que, como me lo daben fecho, nunca nun me paré a pensar nello... Pero, ¡ai, amigu!, cuando nun me quedó otra, fui poquitín a poco descubriendo cosines prestoses, faciendo les recetes de mio má y mio güela, cambiándoles pal mio gustu, descubriendo especies, sabores y restaurantes d'otros países y paecióme bien contávoslo: a quienes teis tan perdíos como yo nel entamu, a quienes tenéis una cocinuca pequeña, con un fornu ensin aire y nun tenéis pensao mercar 18 moldes diferentes, nin la Thermomix, nin potes con ases naranxa; a quienes, como yo, vísteisvos delantre una pechuga pitu y una ensalada de llechuga, tomate y cebolla nueche sí, nueche tamién; a quienes nun invitáis a casa a los amigos a ver el bañu nuevu porque nun sabéis que da-yos pa xintar... Pa toos esos ye esti blogue :)